مش أنت اللى مصرى أشرب بقى

علشان انت مصري لازم تعاني
وتفقد كرمتك بكل المعاني
وتحرق في دمك سنين مش ثواني
واوعي تصدق كلام الاغاني
بتاع الحضاره وكاني وماني
ده كله هجايس مايدخل وداني

علشان انت مصري العذاب بيناديك
بتبدا في يومك حاجات بترازيك
في نومك في قومك تعكنن عليك
مافيش ميه تشطف صابونه في ايديك
فتلبس وتنزل وفيك اللي فيك
ورايح لشغلك هتحتاج مواصله
ادي المترو واقف وكهربته فاصله
وفي الميكروباص خناقه وحاصله
واتوبيس فرامله عايزالها وصله
وتوك توك ده تايه ومحتاج لبوصله

بتوصل لشغلك بدم اتحرق
في زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفي كام مواطن عاملك قلق
بيشكي تقول روح اندعق
وعركه وهوجه وشاي اندلق
ومخك خلاص من الصداع اتفلق

هترجع لبيتك ده لو كان في بيت
هتوصل هتندم ياريت ما جيت
مراتك بتصرخ خلاص استويت
عيالك بتطلب وهات كيت وكيت
تزعق تهاتي ياناس اتهريت
ولاحد سامعك مهما هاتيت

عشان انت مصري وده للاسف
فلازم تقاسي تعيش تتقرف
وكل الاساسي في حياتك ترف
فتنسي الكرامه وتنسي الشرف
وتسرق وتنصب او تنحرف
ودمعك بيجري وجرحك نزف
مش انت اللي مصري؟؟؟؟ أشرب بقى